Dataset Viewer
Search is not available for this dataset
text
stringlengths 0
2.91k
⌀ |
|---|
Premier Sarawak Datuk Patinggi Tan Sri Abang Johari Tun Openg arap bendar juluk Sarawak ngembuan kompeni penerebai bilun kediri empu nengah pengawa ngambi ngempu MASwings Sdn Bhd ulih dijapai pengudah Taun Baru China enggau sebedau Hari Raya Puasa taun tu. |
Iya madahka, nya berindik ari pengawa penisih udah tembu sereta sempekat deka disain enda lama agi. |
"Aku amat ngarapka pengudah Taun Baru China enggau sebedau Hari Raya Puasa, kitai deka ulih nyapai juluk ngembuan kompeni penerebai kediri empu nengah pengawa ngambi ngempu MASwings ari Malaysia Aviation Group . |
"Proses penisih udah tembu enggau enda lama agi kitai deka nyain sempekat ngambi ngempu. |
"Ngena model dagang ti setipak enggau tuju sereta ngaga padang bilun antarabansa baru di Kuching, aku arap bendar kitai ulih ngemansangka kompeni penerebai baru nya nyadi kompeni penerebai serantau ti kompetatif, enggau Kuching nyadi hab penerebai baru," ku iya. |
Abang Johari madahka pekara nya dalam jaku pesan nyerumba pengerami Taun Baru China 2025, kemari. |
Bepelasarka ripot berita sebedau tu, kena 13 Januari 2025, perintah Sarawak udah mujur mutarka pengawa ngambi ngempu MASwings Sdn Bhd, ti ngelai singkang ke chukup beguna enggau pengeran nengeri tu deka ngembuan kompeni penerebai bilun kediri empu. |
Abang Johari madahka pengawa berunding bekaul enggau ngambi ngempu udah ditetapka, sereta pengerami nyain Sempekat Jual Beli ditimpuhka diatur ba bulan Februari 2025 di Kuching. |
Sebedau tu, proses ambi ngempu dijangka tembu Disember 2024, tang ditangguh ngagai suku keterubah 2025 ketegal bisi bida dalam pengawa nisih aset entara perintah Sarawak enggau MAG. |
Kena mutarka isu nya, raban ketiga dichiri nisih aset MASwings. |
Abang Johari nyerumba ngintu pengerami Taun Baru China taun tu, iya ngarapka ukai semina raban bansa China tang semua rayat Sarawak lebih agi ngintu pengerami ti besai reti dalam pengaga, seraya begulai enggau diri sebilik sereta bala bakih. |
Sarawak ti diuan pupu bansa enggau mayuh jalai pengarap, iya arap bendar Taun Baru China mega mai pengaga ngagai pupu bansa sereta pengawa ngabang ngayanka penyerakup enggau tanggam kaul ti rat. |
"Aku besampi ngambi ke pengerami Taun Baru China ti diintu tiap taun terus nyadi siti platform ngenegapka pemaik entara bansa nengah pemayuh budaya enggau jalai pengarap di Tanah Kenyalang tu," ku iya. |
Ku iya, taun tu Taun Ular ti ngelai penemu dalam, peragam ati enggau ubah, sereta dipechaya orang ti ada ba taun ular iya nya pemikir ti bisi bakat, nyelai tauka pengelebih enggau dalam runding. |
Nambah nya ku iya, taun ular mega dikumbai taun dinamik endur belajar ari pekara ti udah nyadi enggau nyingkang ke mua ngena penemu dalam, penyedar enggau pengasih. |
"Kitai semua patut bisi ciri-ciri tauka penteba nya kena kitai nempuh pejalai taun baru ti engka penuh enggau peluang sereta pemar. |
"Ngagai bakih kitai bebansa China, berami enggau penuh pengaga, bebakih enggau pemaik. |
Sereta ngagai kitai bansa bukai, beri awak diri ngabang ngagai bakih bebansa China ngena semangat ti seruran deka bebasaka bakih ti enda sama ari sukut jalai pengarap enggau budaya. |
"Aku ngarika diri empu enggau Puan Sri Juma'ani meri Gong Xi Fa Cai, Xin Nian Kuai Le," ku iya. |
Pemansang nengeri ti inklusif enggau tegut nyadi pemun ngagai pemujur tauka penyenang pengelantang ti meruan, ku Tuai Pemegai Menua Tun Pehin Sri Dr. |
Wan Junaidi Tuanku Jaafar. |
Nya alai, ku Tun Wan Junaidi, kerejasama entara bansa patut dikemerat kena nentuka pengelantang pendiau begulai ulih dijapai. |
Iya bepenemu, kerejasama entara raban bansa China enggau Bumiputera di nengeri tu patut ditegapka agi awak ke ulih bekunsi sereta betukar penemu enggau pengelandik. |
"Berindik ari pekara nya, aku meri sadang penemu ngambi ke raban bansa Bumiputera ngenegapka agi kerejasama enggau raban bansa China, ngena peneleba sereta penau enggau pemandai ti dikembuan dua bengkah komuniti tu dalam bidang ekonomi, pengawa dagang, lumba enggau main sereta mayuh agi ba sektor bukai. |
"Nengah kerejasama tu, peluang betukar penemu enggau pengelandik deka ulih ngangkatka potensyel enggau pengulih besemekih raban bansa Bumiputera, seraya sama nyaup pemansang begulai ti lebih inklusif enggau progresif sereta nanggam rat kaul enggau raban bansa China," ku iya. |
Tun Wan Junaidi madahka pekara nya dalam jaku pesan nyerumba ngintu pengerami Taun Baru China 2025, kemari. |
Nambah nya iya madahka, pengawa meransang raban bansa China awak ke ngambi bagi integrasyen ngelui bansa patut diayanka nengah pengawa ti nyata enggau bisi empas, ukai semina wacana ba renggat teori. |
"Aku arap iya nya nengah pengawa ngemeratka prinsip meritokrasi enggau penyerakup, kitai ulih ngamatka pemansang nengeri ti holistik, lurus, enggau inklusif. |
"Seraya lalu nentuka pemujur enggau pengelantang rayat dalam timpuh panjai, sereta nempa raban bansa ti lantang, progresif enggau ulih besemekih," ku iya. |
Nyerumba Taun Baru China ti diintu pagila, iya minta rayat semua ngemeratka pengelikun, lebih agi maya pulai ke menua diri. |
Rayat patut nitihka atur jalai raya kena nentuka pengelikun diri, diri sebilik enggau penguna jalai raya ti bukai, ku iya. |
"Aku mega minta raban bansa ngena Taun Baru China tu nyadi peluang ngepunka pekara ti positif - ngenegapka kaul diri sebilik, nambahka kualiti kereja, enggau sama nyaup ngemeratka pemaik enggau pengelantang raban bansa. |
"Dalam dunya ti majak mar, semangat kerejasama enggau ulih sama meretika entara bansa, nya nyadi kunchi penyulut begulai. |
"Aku enggau bini aku meri Selamat Taun Baru China 2025 ngagai semua rayat Sarawak ti ngerami. |
Ngarapka taun tu mai berekat, rejeki ti nambah, pengerai ti manah, enggau semampai mujur," ku iya. |
Sarawak mungkal taun baru ti chukup manah lebuh produk metanol dieksport ari Bintulu ke China udah dipenyadi kena 14 Januari apin lama. |
Premier Sarawak, Datuk Patinggi Tan Sri Abang Johari Tun Openg madahka pekara nya dijapai pengudah Sarawak Petchem, sebengkah kompeni petrokimia diempu penuh entiti Sarawak, mujur numbuhka loji metanol di Tanjung Kidurong, Bintulu ti ngelai pengeran ngemansangka industri ili sumber gis asal nengeri tu. |
Iya madahka, nya singkang keterubah dalam pejalai nengeri tu nuju pengawa nguna mayuh agi gis nyadi barang mata kena ngasilka produk bukai sereta ngemansutka kuasa kena ngenyakahka ekonomi kitai. |
"Kitai ukai semina deka ke gis kitai dieksport tang mega dikena nyadi barang mata ungkup aktiviti ili ti bukai. |
"Pemansang industri gis domestik kitai deka nyediaka kereja tinggi gaji enggau ngasilka ekonomi menua tu empu. |
"Ngena chara tu, aku arap bendar sumber gis kitai ulih nyadi industri ili besai kena ngubah ekonomi kitai dalam timpuh lima taun ti deka datai enggau udah nya juluk besai deka nambahka penatai pemisi ruang bilik Sarawak ngambi ke setipak, enti enda ngelui ari pukul rata menua," ku iya. |
Abang Johari madahka pekara nya dalam jaku pesan iya nyerumba pengerami Taun Baru China 2025, kemari. |
Nambah nya iya madahka, dalam pegawa nguna gis kena ngemansutka kuasa, pemansang loji janakuasa 500 MW 'Turbin Gas Kitaran Gabungan' berega RM2 bilion di Miri ti dipejalaika PETROS, ngayanka pengeran nengeri ngena gis kena ngasilka kuasa awak ke bisi dikena industri enggau dieksport ke menua ti beserimbai. |
"Industri gis kitai ukai semina ungkup Utara Sarawak aja laban Perambu Gis Sarawak udah nyediaka langgur komprehensif kena nyadung gis asal ke terminal gis ti dilanggur ba penyangkai kapal tasik dalam baru di Tanjung Embang di Kuching. |
"Taja pan gis kitai dieksport ke menua bukai kenyau 40 taun ti udah, bedau laun kitai nguna mayuh agi gis kena ngemansangka industri gis domestik kitai empu awak ke Sarawak ulih bulih mayuh agi penguntung ari produk enggau servis nilai tambah," ku iya. |
Nitih ke iya, semua pemansang strategik nya enda ulih dipeda enti ukai ketegal begulai input entara sektor perintah enggau komuniti dagang ti udah duduk nyadi kaban Majlis Tindakan Ekonomi Sarawak lalu ngelangkar nuju ngagai transformasyen ekonomi pengudah COVID-19. |
Input dipegulaika nya, ku iya, udah meri awak nengkebang Strategik Pemansang Pengudah COVID-19 2030 ti bepelasarka tiga tiang pemun iya nya pemujur ekonomi, inklusif sosial, enggau pemeruan rampa menua. |
"Enggau temegah ati aku deka madah, Sarawak udah ngasilka langgur ti bestruktur enggau konkrit kena ngemudika nengeri tu nyadi sebengkah wilayah maju enggau tinggi penatai pemisi lebuh datai 2030," ku iya. |
Pengelebih tauka pengering Sarawak bepanggai ba pengaya lanting budaya enggau pemaik sereta pengelantang bansa ti meruan. |
Sapit Premier Sarawak, Datuk Amar Awang Tengah Ali Hasan madahka, kualiti unik nya disukung penegap politik enggau bakat rayat nengeri tu. |
"Pengelebih Sarawak bepanggai ba lanting pemayuh budaya kitai enggau pemaik sereta pengelantang bansa ti meruan. |
"Kualiti unik tu, disukung penegap politik enggau bakat rayat kitai, udah ngasuh Sarawak ngerembai maju ti nyadi kelai penyerakup enggau pemansang. |
"Ngarapka pemaik sereta pengelantang tu ngiring kiti nengah Taun Ular seraya kitai ngembuan juluk ti tinggi agi," ku iya. |
Menteri Pemansang Mengeri enggau Pengeraja Asal Kedua madahka pekara nya dalam jaku pesan nyerumba Taun Baru China 2025, kemari. |
Ngenang Taun Baru China, iya madahka Taun Baru Lunar maya ngingat pekara ti udah nyadi enggau penyulut ti udah dijapai seraya nagit jemah ila deka manah ari ti udah. |
Iya ngarapka pengerami taun tu meri pengaga enggau penyerakup ngagai semua. |
"Aku meri selamat Taun Baru China ngagai semua raban bansa China di Sarawak lebih agi, ngarapka pemujur enggau pengelantang deka ulih dipajakka maya kitai betapi enggau gaya ke nyadi ba dunya ti seruran berubah. |
"Aku ngarapka ba taun 2025 deka mai berekat pengerai, pengaya enggau pengaga ngagai semua orang. |
"Aram kitai sama beratika penemu dalam tauka pemintar Ular sereta sama maju enggau pemerani," ku iya. |
Bisi 45,313 indu di serata Sarawak beperesa virus papiloma manusia DNA kena nemu tauka ngiga penyakit riman sarang anak tauka serviks ari taun 2019 ngagai 2024. |
Menteri Pemansang Indu, Ruang Bilik enggau Raban Bansa, Dato Sri Nancy Shukri madahka ari penyampau nya, bisi 3,037 kes positif HPV ditemu. |
"Taja semina 3,037 kes positif HPV diripotka, kitai mujur nagang mayuh agi kes enda nyadi riman nengah pengawa nemu tumu. |
Tu ngayan asil pengawa kitai meri impak. |
"Kitai deka ke tiap iku indu nemu iya nya riman sarang anak ulih ditagang enggau diperubatka, lebih agi enti ditemu tumu ngena teknologi perubat ti majak maju," ku iya lebuh bejaku ba pengerami ngintu Bulan Penyedar Riman Sarang Anak Nasional Taun 2025 ditu, kemari. |
Nancy madahka riman sarang anak sudah dikumbai 'pembunuh senyap' laban jarang ngayanka keli ba renggat tumu. |
Bepelasarka Tinjauan Kebangsaan Kesihatan dan Morbiditi 2023 ku iya, bisi 65 peratus indu umur lebih ari 20 taun enda beperesa riman sarang anak dalam tiga taun kepenudi. |
Entara kebuah, ku iya, mayuh indu ngasaika diri gerai ari sebarang penyakit, nadai kelai enggau nadai awak tauka hari. |
"Tang kebendar, kelai enda patut nyadi tanda sukat pengerai. |
Beperesa HPV DNA ulih ngiga ke dirampit nyentuk 10 taun sebedau berubah nyadi riman. |
"Ngena teknologi pemadu baru, kitai ulih nemu risiko tumu agi enggau bejalaika nama ti patut," ku iya. |
Berindik ari pekara nya, Nancy bekunsi pemansang positif di Malaysia, bepelasarka ripot Riman Nasional bisi ngayanka insiden riman sarang anak ti nurun ari tangga ketiga ngagai tangga keenam entara riman indu dalam timpuh 2017 nyentuk 2021. |
"Chukup ngemegahka, riman sarang anak iya nya semina riman ti nyadi ba raban indu ngerikotka insiden ti nurun," ku iya. |
Bisi 162,581 indu di serata Malaysia beperesa riman nya ari taun 2019 ngagai 2024. |
Ari penyampau nya, bisi 10,582 kes positif HPV ditemu, 135 kes prakanser dikelala enggau 17 kes positif rimah udah diperubat. |
Penanggul tanah tusur diripotka bisi nyadi ba mua sebuah rumah panjai di Lichok Asal, ditu, ensanus. |
Pegawai Angkatan Pertahanan Awam Malaysia Pelilih Menua Saratok, Leftenan Nur Athirah madahka, seraban APM diasuh ngesah ke rumah panjai nya pengudah nerima ripot bekaul enggau pekara nya ari mensia mayuh. |
"Asil ari pengawa pematau, raban APM bisi tetemuka tanah tusur nyadi ba mua rumah panjai nya. |
"Pekara nya nyadi dipelaba ketegal faktor ujan enda ngetu enggau ai besai ngujungka ai kelalu deras ti lalu ngasuh tanah nya tusur," ku iya mdah ngagai pengarang berita, ensanus. |
Dalam timpuh ti sama ku iya, kandang endur ba tanah tusur nya agi ulih dijaga. |
Tang ku iya, raban APM ngelalau peranak ngambi ke bejaga-jaga sereta bejimat enggau tanah runtuh nya. |
"Bepelasarka pekara ti nyadi nya, raban APM udah masang tali 'sawar-sawar' ba endur tanah runtuh kena ngingatka ngambi ke bejaga-jaga. |
"Peranak mega diingatka seruran matau gaya tanah runtuh nya enggau patut ngeripot enggau jampat nyema majak balat nyadi," ku Nur Athirah. |
Kena ngingatka sejarah bujang berani Katibas, Balang tauka dikelala enggau nama Balang Balai Nyabung bisi siti projek nulis baru sejarah pasal nya udah dilanggur. |
Kaban Kunsil Nengeri Katibas, Lidam Assan madahka, Balang bebendar nanka kandang menua Katibas ari pengawa koloni luar maya jeman Raja Brooke merintah. |
"Tuju inisiatif tu kena ngingatka jasa Balang nyadi kelai pemerani enggau penegap runding nanka tanah menua. |
"Idea tauka penemu tu tebantai pengudah seminar ngingatka 100 taun Sempekat Pemaik Kapit 1924-2024 apin lama sereta baka ti dipadah ba taun 1924 bisi betempuh tauka perang besai entara raban bansa Katibas enggau pengemeran koloni ti diiring Charles Brooke," ku iya. |
Iya madahka pekara nya ngagai pengarang berita pengudah ngulu Aum Raban Pengereja Khas Nyerungkai Sejarah Bujang Berani Balang Balai Nyabung ba sebengkah hotel ditu, malam ensanus. |
Lidam madahka sejarah nyebut bisi empat ekspedisyen dipejalaika orang luar ba era James Brooke kena ngalahka Katibas, tang Balang begulai enggau peranak menua nya berani nanka kandang menua sida. |
"Nyadi peturun Katibas, aku berasai teperansang sereta bisi pematut nulis enggau mansik baru sejarah Balang. |
"Tu beguna laban tebal agi sejarah ke bisi sehari tu ditulis orang luar ti engka enda nyerita cherita ti amat nyadi," ku iya ti mega patron projek tu. |
Iya mega madahka pemesai guna projek nya kena nentuka rebak dudi nemu penatai asal diri. |
Ku iya pengawa nuliska sejarah Balang nya beguna laban dipelaba rebak diatu engka enda mayuh nemu, enggau rebak dudi ila dipelaba engka endang enda nemu. |
"Nya alai, udah nyadi tanggung pengawa kitai nulis enggau ngemetulka sejarah tu ungkup rebak dudi," ku iya. |
Terang iya, projek nulis baru sejarah nya dilanggur deka tembu dalam timpuh dua taun ti nyengkaum ngumpul penerang, nentuka fakta, sereta dokumentasuen artifak enggau kereban sejarah. |
"Kami deka bekerejasama enggau penulis bisi peneleba baka Profesor Datu Dr Neilson Ilan Mersat enggau Dr Philip Beginda sereta sukung ari Song Graduate Club ti nyadi sekretariat," ku iya. |
Kelimpah ari nulis sejarah ku iya, siti tugu pengingat kena ngingatka jasa Balang mega deka didirika ba kandang menua Katibas. |
Nya alai, Lidam minta peranak asal Katibas lebih agi peturun Balang ngambi ke bekunsi penerang, artifak enggau cherita pasal Balang ti engka agi bisi ba sekeda ari sida. |
"Kami nemu bisi aris Balang ti agi idup enggau nemu cherita ke amat pala iya. |
"Nya kebuah, kami deka ngumpul penerang, nyengkaum artifak, endur iya diau, sereta jasa ti kala dikereja iya kena nanka kandang menua Katibas," ku iya. |
Opis Menteri Pengerai Mensia Mayuh, Pengawa Berumah enggau Perintah Lokal Sarawak sedia mantu Opis Menteri Dagang Dalam Nengeri enggau Ungkus Idup Sarawak bejalaika pengawa meresa enggau matau pengulih nitihka rega ba pasar besai, pasar tani enggau palan bebeli barang di nengeri tu. |
End of preview. Expand
in Data Studio
README.md exists but content is empty.
- Downloads last month
- 24